Ua vaeluaiana le finagalo o le afioaga o Malie i se faaiuga a alii ma faipule lea ua faate’a ese ai le sui tauva a le Faatuatua i le Atua Samoa ia Tasi Faalogo Ivins Chan K Tong mai lea afioaga ao loma ai faigapalota laiti i le vaiaso nei.
Ua faaali finagalo a nisi o matai o le afioaga e lē auai i lea faaiuga na faia e matai matutua o le nuu ina ia faatulai ese lea sui a le FAST.
E pei ona silafia na faatulai ese Faalogo mai Malie ona o le lē usitaia o le tulafono a lea nuu e lē taliaina ai ni faalauiloa mai soo se vaega faaupufai ao loma ai le palota laititi i le Aso Faraile nei, peitai na agai lava Faalogo ma fai tapenaga o le faalauiloa a le FAST e ui e le’i taunuu ae o le iuga lea o le faate’a ese ai ma le nuu.
Taua foi e nisi o matai a Malie ua tele le feeseeseai o le afioaga ona o mataupu tau polokiki ma o le faamoemoe ina ia faatumauina le filemu i totonu o le afioaga.
O loo taua e nisi o faaiuga ia na talanoa ai i le fonotaga a le nuu e leai se faaiuga aloaia faapea e faataga faalauiloa pe faasa foi. Na faamaonia foi e le Pulenuu ia Tuiatafu o le faaiuga e ala i le faate’a o Faalogo na tuuina atu e matai matutua o le nuu e ui o loo manatu nisi e le’o se faaiuga mai le nofoaiga a alii ma faipule o Malie.
O Faalogo o le isi lea sui tauva mo Sagaga No. 2 i le faiga palota laititi o loo loma nei i le Aso 26 o Novema.
