Ua i luma nei o le komiti faatonu o le poloketi tasi le miliona tala fautuaga a le Loia Sili, e tusa o le taunuuga o su’esu’ega a le matagaluega o tupe a le Malo, i le lē tausisia e itumalo o Lepa ma Faasaleleaga 2 o ta’iala e faaaogā iai seleni o lea atina’e mo le manuia o itumalo ta’itasi ma o latou tagata.
Ua ioe le Loia Sili i le lē tausisia e Lepa o ta’iala o le lisi mo ofisa o Fono Faavae, peitai ua fautuaina le Komiti Faatonu e faamatuu vaegatupe ua taofia, ona e atagia foi le lē tausisia e Fono Faavae a nisi o itumalo o aiaiga ma ta’iala o lisi, ina ne’i faapito ai ua na o Lepa o loo aafia i ia tulaga.
E 90 afe le vaegatupe sa taofia mai le tufatufaga o le miliona lona lua mo lea itumalo.
O Faasaleleaga 2 ua lagolagoina foi e le Loia Sili le taunuuga o su’esu’ega a le matagaluega o tupe e pei ona maua ai, ua lē sa’o le faaaogāina o se vaega o tupe o le poloketi.
O lea vaegatupe e 175 afe mo le ofisa o le Fono Faavae ma alauni o tagata faigaluega.
Ua fautuaina foi le komiti faatonu e le Loia Sili ina ia silasila poo tausisia e lea itumalo aiaiga ma ta’iala o le lisi o ofisa o Fono Faavae.
Sa fesiligia le tamaitai Minisita o le matagaluega o tina ma tamaitai, atina’e o afioaga ma aga fesoota’i o loo vaaia le poloketi tasi le miliona tālā i sona finagalo i le fautuaga a le Loia Sili, ae sa ia faailoa mai e le maua sona taimi ona ua vave le fono a le Kapeneta i le Aso Tofi.
Ua faailoa e le minisita le afioga Mulipola Anarosa Ale Molioo, o le a iai se taimi ona maua lea o se feiloa’iga ma tusitala e faailoa ai sona finagalo i le mataupu.
