I le silia ai nei ma le tausaga talu ona maliu se tama tane sa maupaolo i le aiga o lona toalua i se nuu i Savaii, o le masina lenei o Mati na faia ai le faasalaga a le faamasinoga i se isi tama tane o lona tuafafine sa nonofo ma lē ua maliu.

O Ioelu Mamea o Saasaai i Savaii na tetee i le moliaga a leoleo o le fasioti tagata pa’ivalea, ae ina ua mae’a ona suesue molimau e sefulu a le itu a leoleo, na suia ai le tetee a Ioelu i lona ioeina o le moliaga ma tapena ai loa le faaiuga i se faasalaga. 

O faamaumauga a leoleo e pei ona faailoa i le faaiuga tusitusia a le faamasinoga, o loo faapea mai ai o lē ua faalepuipui nei mo le 2 tausaga ma le fitu masina, sa fai se latou gasesega o le meaai o le afiafi ma lē ua maliu, ma le uso matua o lē ua fano le soifua.

A o faia le gasesega e pei ona sa faavai ai se meaituaolo, sa inu ai ma le avamalosi.

Na savali atu lē ua molia o le a sii le ulo o loo tunu ai le alaisa i le fale i luma ae valaau atu lē ua maliu e aua ne’i masaa.

E lei faalogo iai lē ua molia ae alu atu sii pea le ulo alaisa ma masua ai i lalo ma toatama’i ai loa lē ua maliu.

Na tupu ai se tauga upu a lē ua maliu ma le tuagane o lona toalua ma palauvale ai ma lē ua molia.

Na alu atu lona tina ma tata’i i luma o le fale a o mulimuli atu ai lē ua maliu.

O le taimi lea na iloa mai ai e lē ua molia le toalua o lona tuafafine ma ia tago loa i se maa ma togi ai.

O le gaioiga lea na palasi ai i lalo le tamaloa, ma faapena ona ave ai i le falemai i Tuasivi.

Faaalia i faamaumauga a leoleo na taunuu i le falemai le mau paolo ua i’u lona ola.

O le suesuega a le fomai na iloa ai o le ogaoga o le manu’a i le fatafata o lē ua maliu e mafua mai i le maa.

Na faaalia e lē ua nofo sala i le toese na te lē iloa poo gafea o le tino o le toalua o lona tuafafine na lavea i le maa.

O lē ua faasalaina o se tama tane ua 29 tausaga o le soifua e lei faia sona aiga.

O itu lelei mo ia sa faatāua i le faaiuga o le ifoga a lo latou aiga na alu i le aiga o lē ua maliu i se isi afioaga o le motu o Savaii.

Na faatāua foi e le faamasinoga lona matuā salamo moni mai lana solitulafono.

O le taimi sa nofo taofia ai i le vaaiga a leoleo a o faagasolo suesuega, ua toesea mai lona faasalaga 2 tausaga ma le fitu masina i le falepuipui.