I le tuanai ai o tausaga o faatonutonu atu i le nofoaga o le tower i le malaevaalele faavaomalo i Faleolo malaga a vaalele e afea le malaevaalele i Tafuna i Amerika Samoa mai le 9 i le po e oo i le 6 i le taeao, o lea ua iai nei se suiga fou i lea auaunaga, i le faatonutonu uma atu lea i Faleolo o malaga a vaalele e afea Amerika Samoa i totonu o le 24 itula.

Ua faailoa lea suiga e le afioga i le Minisita o Galuega tetele e aofia ai le pulega o malae vaalele le tofa Olo Afoa Fiti Vaai, ina ua mae’a ai le fono o le Atoa o Samoa sa usuia i le teritori o Amerika Samoa i le vaiaso na tea nei.

Faaalia e le Minisita o se suiga o le a fesoasoani i tupe maua a le pulega o malaevaalele a Samoa ae o se suiga foi ua faamautu atili ai le galulue faatasi o faigamalo a Samoa i Sasa’e ma Sisifo i auaunaga mo le manuia o tagata o atunuu e lua.

I le galulue faatasi ai o faigamalo a Samoa e lua, o lea ua faailoa foi e le Minisita le faagasolo o galuega i le faaopoopo o le auala e tulaueleele ma oese ai vaalele laiti i Fagalii, ma o se galuega ua faamoemoe a mae’a, ona toe tatala ai lea o le malaevaalele i Fagalii i le aso 29 o le masina fou o Me.

Se faatalanoaga ma le afioga i le Minisita o Galuega tetele e aofia ai le pulega o malaevaalele le tofa Olo Afoa Fiti Vaai.