I se lipoti lata mai ile mataupu o loo talanoa ai nei le toatele mai le polokalameo faailoga taualoa a le au fai ata tifaga pei ona faaigoaina o le Oscars, ua faailoa mai I le aso ua faatoese nei le alii o Will Smith I le alii faimeamalie o Chris Rock ona o le mataupu na tulai mai I le aso ananafi.

E le taumate ua toatele ua maimoa I le taimi na faaoolima ai Will Smith ia Chris Rock ma e taofi eseese iai le toatele. Fai mai nisi e le tatau lava ona faatagaina ia ituaiga amioga o sauaga I totonu o ituaiga faamoemoe tetele faapea poo soo se mea lava ma o I latou ia e ao ona taulamua ini faataitaiga lelei mo tagata aemaise lava fanau e fiafia e matamata I le televise.

Ua faailoa la I le aso ua tuuina ane se faamatalaga tusitusia mai le alii o Will Smith ua faailoa ai ma faatoesega ia Chris Rock lea ua maea ona ia faailoa I leoleo ilea faaitu o Amerika o le a leai sana tagi e faia I le mataupu lea.

O se tala malie a Chris Rock sa faia mai I le toalua o Will, le tamaitai o Jada Smith na mafua ai le mataupu. Fai mai finagalo o nisi ana talia lelei e le tamaitai o Jada le tala malie semanu e le oo le mataupu I lea tulaga, aua e tatau ona malamalama I taimi o tausuaga e tupu ile tele o mafutaga ma soo se faamoemoe foi.