I le tau e silia i le 600 afe tala na faatutū ai sailini leo tetele e logo ai tagata uma o alaala i nofoaga tulata i le vaitafe o le Vaisigano i Apia i taimi o lologa ma tafega pe a oo i taimi leaga o le tau, o lea ua amata faaaoga nei ia sailini a o iai lo tatou atunuu i le tau o afa, ma matagi faapea timuga mamafa e mafua ai tafega ma lologa.
O le nofoaga o le afi eletise i Tanugamanono, o le ofisa autu o le matagaluega o aoga taaloga ma aganuu i Malifa, o le Apia Park, nofoaga faasao i Magiagi ma Lalovaea ua faatutu ai ia sailini.
O le vaiaso nei sa faalogoina ai le leo tetele o ia faailo a o faataitai ina ia mautinoa ua ola ma lelei mo le faaaogaina. E le gata ina aoga e logo ai taimi o tafega ma lologa, ae tāua foi mo le logoina o ni afa ma galulolo poo sunami.
Faaalia e le Minisita o le Matagaluega o Puna’oa Faalenatura ma le Siosiomaga sa ia tatalaina le faaaoga o ia sailini, le afioga Toesulusulu Cedric Schuster, o se taimi tāua tele lenei ua mae’a ai lea galuega na amata i le tausaga e 2017, ona e aoga e faasao ai ola ma soifua o tagata i taimi o mala faalenatura.
