E silia ma le 4,000 o tagata faigaluega a le soifua mālōlōina i Hawke’s Bay o lea ua faasoa iai le $15.2 miliona lea ua faamatuu mai e toe faasa’o ai le totogiina o livi e le’i sa’o ona fai.
O le 4,120 lenei e aofia ai tausi soifua, foma’i, ‘aukiligi, o i latou e galulue i ofisa faapea ai ma i latou o loo lagolagosua i auaunaga a le soifua mālōlōina.
Faamaonia mai e le sui o le pulega ananafi o lea ua faagaioi uma ananafi totogi o livi toe faasa’o nei mo le aufaigaluega i Hawke’s Bay ma o lona uiga o le asō e maua ai.
O le tupe ua toe faamatuu atu ia Hawke’s Bay o le lona valu ai lea o pulega i totonu o le atunuu ua toe faasa’o le totogiina o livi e le’i sa’o ona fai muamua, ma o lea ua silia ai nei ma le $254 miliona tupe ua faamatuu mai mo le tusa ma le 34,300 tagata faigaluega.
O lea lava e faasolo le toe totogiina mai o livi o tagata faigaluega a le soifua mālōlōina na sese ona fai ona o le Holidays Act, ma o lea e lata i le 2/3 o tagata faigaluega a le matagaluega lea lava e tatali.
O loo faamoemoe e tatau ona totogi uma mai tagata faigaluega a le soifua mālōlōina o loo galulue pea i le taimi nei ae e le’i uma Iulai o le tausaga fou, ae mo tagata ua faamavae ma tuua le soifua mālōlōina ae o loo agavaa ai, o le amataga o le tausaga lea o loo faamoemoe e amata totogi mai ai.
Puna o Faamatalaga: Over 4000 Hawke’s Bay Health NZ staff receive $15m in holiday backpay | RNZ News
