I le tuua ai o le atunuu i le faai’uga o lena vaiaso mo fonotaga faalemalo i atunuu i fafo le afioga i le Minisita o le Matāgaluega o Tina ma Tamaitai Atina’e o Afioaga ma Agafesoota’i, sa ia toe faailoa mai i le Aso Faraile na te’a nei ua faasa’o le mataupu sa faitau eseese ai ma le faipule o Faasaleleaga 2 e tusa o le vaegatupe e 175 afe tala lea sa iai se tuua’iga ua lē tonu lona faaaogāina.

Faaalia e le minisita le tofa Lagaaia Ti’aituau Tufuga o le faasoaina o vaegatupe o le miliona tala lona 2 mo lea itumalo na faamatuu ai ma le 175 afe sa taofia a o tālia sa’ili’iliga sa faia.

Ua faamautū atili lea finagalo o le minisita i se pepa o faamatalaga faalaua’itele mai le faipule o Faasaleleaga 2 o le ta’ita’ifono o le Fono Faavae a lea itumalo palota le afioga Magele Sekati Fiaui.

Ua faaalia i le pepa o faasalalauga o le aoauli o le Aso Faraile na te’a nei na faaoo atu ai i le faipule se tusi mai le Matāgaluega o Tina ma Tamaitai Atinae o Afioaga ma Agafesoota’i ua faailoa ai le i’ugafono a le Komiti Faafoe o le poloketi o le tasi le miliona sa faamalieina ai le komiti i le faaaogāina o le vaegatupe sa fesiligia.

O le aso foi lea na faia ai le i’ugafono e faamatuu loa le 175 afe o le miliona lona lua a le itumalo sa taofia a o faatali le taunuuga o su’esu’ega.

E manino mai i le faaaliga a le minisita ma le pepa o faasalalauga faalaua’itele mai le faipule o Faasaleleaga 2, e le’i aafia i ni gaioiga solitulafono le faaaogāina o lea vaegatupe.

E lua vaiaso o loo tuua ai le atunuu e le minisita o loo iai le vaaia o le poloketi miliona a le malo mo se fonotaga o loo malaga ai ma le Ofisa Sili o lana matāgaluega faapea se ofisa sinia.