O puipuiga faifai pea o le atunuu mai le flu ma le faamai Koviti-19 o loo tata logo ai pea le matagaluega o le soifua maloloina i lo tatou atunuu ina ia tausisia, a o tumutumu mai tagata malaga mai fafo auā faigamalologa ma tafaoga o le faaiuga o le tausaga.

O faamaumauga i le fitu aso ua mavae a le auaunaga a le soifua maloloina ua faailoa ai le faaopoopo pea o tagata ua aafia i auga o le Koviti-19 lea ua oo atu i le 58 mai le 41 sa iai i le lipoti mulimuli a o lei oo i le aso Kerisimasi lea na pa’ū tonu i le Aso Gafua o lenei vaiaso.

O le aofaiga e 58 o gasegase fou o le koviti ua faamauina ai le siitia o le numera o tagata ua aafia i le 8 tesimale 66 pasene. 

Ni finagalo faaalia o le Faatonu Sili o le soifua maloloina Susuga Aiono Dr Alec Ekeroma ma le Sui Faatonu Sili le afioga Tagaloa Dr Robert Thompsen i se polokalame faalauiloa a le soifua maloloina e faasino tonu i puipuiga o le atunuu a o iai i lenei taimi o aso fiafia o le Kerisimasi ma le Tausaga Fou.