Ua faatonuina e le Faamasinoga Maualuga lē sa avea ma Loia Sili a le Malo, le afioga Savalenoa Mareva Betham Annandale ia totogi le 5 afe tala i le afioga i le Palemia le afioga Fiame Dr Naomi Mataafa, ina ua faalēaogā e le faamasinoga i lana faai’uga le tagi o se su a lē sa avea ma Loia Sili na tuua’ia ai le ta’ita’i o le Malo i le solitulafono o lana faai’uga na faamuta ai lona tofiga Loia Sili a le Malo.
Ua faailoa i le faai’uga tusitusia o lenei mataupu tau faamasinoga sa suesueina i le masina o Iuni mo aso e lua, sa lē mafai e Savalenoa Mareva ona tauave ona tiute faa-Loia Sili i nisi o mea sa tutupu ma aliali mai ina ua mae’a le palota tele o le 2021, seia oo ina ulufale le faigamalo fou i le aso 23 o Iulai o le tausaga lava lea.
O le 3 masina o aafia i tulaga lē mautonu upufai o Samoa i le mae’a o lena faigapalota tele a le atunuu o le silasila a le faamasinoga e lei tu i se tulaga tutoatasi le faatinoga o tiute o le Loia Sili i lena taimi.
Sa tuuina atu e le Palemia i le faamasinoga nisi o mea na tutupu i le taimi o le fesoua’ina o upufai o le atunuu e lagolago ai lana faai’uga e faamuta le taimi galue o lē sa avea ma Loia Sili ona ua leai se faatuatuaga.
Ua teena ma faalēaogā uma e le faamasinoga i lea faai’uga le vaega o le su mo le faia o se isi iloiloga faaletulafono poo se judiciary review ma le tulaga i le faaleagaina o lē ua tagi poo damages.
O se alii faamasino mai fafo o Justice Harrison sa faafoeina lea faamasinoga sa molia ai e lē sa avea ma Loia Sili le ofisa o le Loia Sili a le Malo, ma le Palemia.
O se alii loia mai fafo o Rodney Harrison ma se loia i Samoa le afioga Fuimaono Sefo Ainuu sa tauaveina le tagi a Savalenoa Mareva Annandale Betham, ae o le loia le afioga Taulapapa Brenda Heather Latu ma le loia mai fafo o Ben Keith sa tulai mo le itu na molia e le itu tagi.
