Ua tuanai le 2 tausaga sa taumafai ai le Malo ma le pulega o le kamupani vaalele o le Samoa Airways e togitogi aitalafu sa mafua ai ona faia le faai’uga a le faigamalo fou e taofi le toe lisiina mai o se isi vaalele tele ma toe faafoi ai le 737-800 na fuafua e amata faaaogā i le tuanai o le pepesi o le faamai Koviti-19.
O le lua tausaga ua mavae e pei ona faailoa e le Minisita o loo iai le vaaia o le kamupani vaalele a le atunuu a o tauaofia le Palemene, ua tulai mai ai i ni tulaga manuia taumafaiga mo le totogiina o aitalafu a le Samoa Airways lea ua faaitiitia i le 10 miliona tala.
O le tauaofiaga ua mae’a nei a le Fono usu a Samoa, o le tasi lea o atina’e a le Malo sa matuā samala i saunoaga faalauaitele a sui faipule o le Itu Agai e oo lava i le ta’ita’i.
O se mataupu foi e pei ona silafia, sa lē nofoai ai le ta’ita’i ma le Itu Agai i le tu’itu’i pea i le Malo talu mai le amataga o le paeaiga lona 17 a le Palemene i le naunau e toe faatino malaga a le vaalele tele 737-800 ona e iai ona tāua i le atina’e o tagata tafafao aemaise o le lautele o le atunuu i tulaga o le maua o se fesoasoani i le taugata o pasese o vaalele.
Peitai e tasi lava le pese o loo usu e le faigamalo ma le Minisita o loo iai le vaaia o le Samoa Airways o le onosai ma taatia atu.
Se vaega o felafolafoaiga i le mataupu i le vaalele ma le Samoa Airways ma le finagalo tali o le Minisita o loo vaaia lea atina’e a le Malo, le tofa Leatinuu Wayne Sooialo.
