O le vaiaso nei na faailoa ai le faailoga poo le logo ma le autū o le faamanatuga o le 60 tausaga o le tutoatasi o Samoa i le tausaga nei. O le autū tauave o le faailoga o le Folau ma le Faatuatua poo le Sail with Faith.
Ua faailoa ai foi le sola ai ma le manumalo i le faailogatupe e 5 afe tala le kamupani Niu Sila o le Bluewave i le faaiuga o le tauvaga sa sailia ai se faailoga poo se logo o le faailogaina o le Iupeli taimane le 60 tausaga o le Tutoatasi o Samoa mo lenei tausaga 2022.
O se kamupani e umia ma faagaioia e nisi o tamafanau a le atunuu o loo faamautu i Niu Sila ae o loo iai foi lona ofisa i Samoa. O le afiafi o le Aso Lulu o lenei vaiaso i lumāmaota o le Malo na faalauiloa ai le faailoga ma o se sauniga sa auai le Ao o le Malo ma le Sui o le Fono a Sui Tofia, o le Palemia ma le Kapeneta ma faauluuluga o matagaluega ma faalapotopotoga a le Malo aemaise o le komiti o tapenaga o le tutoatasi.
