Faaeteete e lē taumate o le a faateteleina le aofai o gata e vaaia i le tau mafafana lenei, o se lapataiga lea ua tuuina ane i tagata uma aemaise ina ua faamaonia le maliu o se tamā e 69 tausaga ina ua u e le gata a o taumafai e laveai si ana uo o le isi foi tamā.
Fai mai lipoti e ono maualuga atu le aofai o gata o le a vaaia i le tau vevela o le a sau nei i Ausetalia pe a faatusa atu i isi tau vevela i tausaga ua tea.
O le aso ananafi na faamaonia ai le maliu o sia tamā mai North Queensland a o taumafai e laveai si ana uo mai le gata lea a o iai i le itu i Saute o Mackay mo se sauniga na faia ai.
Fai mai le auaunaga faavavave o le fautuaga mo tagata uma, ia faamamao ese ma nofoaga e ono iai gata ma taumafai e agai malie ese pe afai e vaaia se gata i soo se vaega ma faamautinoa o loo tapuni i taimi uma faitotoa o fale.
