O le pipisi ai o le isi vairusi o le Koviti19 le Omicron ua avea nei ma pogai o le pa’ū o le tau o le suauu penisini i le atunuu i le masina amata o lenei tausaga fou.
O le finagalo lea o le tamaitai Minisita o Tupe le afioga Mulipola Anerosa Ale Molioo i le faalauiloaina mai ai o tau fou o ia oloa mai fafo mo le masina o Ianuari.
O tau o suauu ma penisini mo le masina amata o lenei tausaga fou ua faatulaga mai i tau o ia oloa sa iai i le masina o Novema i le tausaga ua mavae atu nei i le atunuu o Singapore. Faaalia e le Minisita o Tupe na palasi le tau o le suauu i le masina lea ma mafua ai ona aluifo i lalo ma le tau e pei ona faatulaga mai ai nei o le penisini sa $3.15 i le litre ia Tesema ua pa’ū mo Ianuari 2022 i le $3.03 i le litre.
Sa faailoa i se finagalo o le tamaitai Palemia i le masina na tea nei o Tesema e matuā leai se aafiaga o fuafuaga ua faataoto e lana faigamalo fou i le siitia ai o le tau o nei oloa i le masina ua mavae aemaise lava le tau o le penisini.
