Na liki ogapaipa o loo alu ai vai leaga o otaota ma faaleagaina ai le suāsami.
Ua faamaonia mai e le pulega o le suavai a Ueligitone, le Wellington Water o le aoauli o le Aso Toonai lea na amata liki ai, ma o le aso lava foi lea na amata galulue ai le aufaigaluega seia oo ina mālōlō i le po ona ua sua le tai ma faigata galuega i le pogisa.
O le ogapaipa i Eastbourne o loo faia nei iai galuega faaleleia e faapea o se tasi o ogapaiga autū ma i ata na maua mai o lea ua alu vai leaga agai i le sami.
Na tapunia faamalosi ai ma nisi o matafaga i Ueligitone ananafi ma o lea foi ua iai faailoilo e lapata’ia ai tagata i le aafiaga o le suāsami ua iai.
E lē o mautinoa le umi e faasolo ai galuega faaleleia mo le ogapaipa ua faaleagaina, ae mo tagata Eastbourne o lea ua faatonuina ia tuuitiitia le faaaogā o falelēta’ua faapea faletaele ina ia fesoasoani i le tele o le vai lafoai alu i ogapaipa lea o loo tau faaleleia.
Puna o Faamatalaga: Wastewater discharging into Wellington Harbour after pipe breaks (1news.co.nz)
