O loo sasaa mai pea fesoasoani a le Malo o Saina i le atina’eina o tagatanuu Samoa e ala lea i se aoaoga e patino lea i suisuiga ma meataulima mo sui ua filifilia mai itumalo i le atunuu.
O lenei fesoasoani o le lona tolu lea ona faatino ma o auga o aute ia tapu’e lea o tomai ma agavaa mai se aumalaga mai Hunan i Saina o le a taitaiina lenei aoaoga.
I le tatalaina ai o lenei faamoemoe na faailoa ai e le Palemia, Afioga Fiame Naomi Mataafa le tatau ona faaaogā o nei avanoa ua maua mo le atina’eina o aiga.
“Ia siitia tomai ma agavaa o tina ma tamaitai, tupulaga talavou, alii (tamā) ma i latou e iai aafiaga tumau o le soifua i le su’iina o soo se ituaiga laei e moomia e le aiga.
“la faaaogā le tomai ma agavaa i le fausiaina poo le amatalia o pisinisi laiti auā le atina’eina o aiga, nuu, itumalo ma Ekalesia i tulaga tau tamaoaiga.
“O lenei a’oa’oga sa fuafuaina e faataunuuina i le tausaga e 2019, peitai sa toe faapafala ona o le Koviti-19.”
O se faamanatu foi mai le Palemia ia i latou ua filifilia o avanoa faapenei e lē faigofie ona maua.
“Ia outou faatāua le avanoa ma faaaogā tatau, e toatele tagata o le tatou atunuu e agavaa i lenei polokalame ae ua filifilia outou e fai ma sui.
“Ia outou talia ma le loto faafetai le faamuamua ua tuuina atu ia te outou, ma ia fai i le mea e gata ai lou mafai.
“Ia e faamaoni i le 7 vaiaso o le aoaoga e ala i lou auai, ma pu’epu’e mau tomai o matuaofaiva mai Saina.
“O le faamoemoe, ia mae’a ane lenei 7 vaiaso, ua maua sou tomai fou i lenei faatufugaga, ina ia mafai ona fai sa oe lava pisinisi laititi e fesoasoani i le tamaoaiga o lou aiga, nuu ma lau ekalesia.
“A manuia oe ma lau atina’e, o le a faapena ona e maua le avanoa e faatelē ai lou faleie, ma fai oe ma faamanuiaga i isi.”
E le itiiti ai le agaga o le faafetai i le Malo o Samoa i le Malo o Saina i le amanaia o Samoa e ala lea i le fesoasoani auā manuia o aiga mo le agai i luma.
O le aoaoga mo Upolu e faia lava i le Maota nei, o le Tooa Salamasina, ma le aoaoga mo Savaii e faia lea i le Ofisa o le Matagaluega o Tina ma Tamaitai i Salelologa.
