O loo tumau lapataiga o timuga mamafa, o lapataiga o ogasami i Matu, faamalosia fautuaga mo lologa ma fautuaga mo savili malolosi  mo le atunuu e pei ona tuuina mai i le afiafi ananafi e le Ofisa o le Vaaitau.

E ui ina faasolo agai ese atu le matagi afā o Osai i vaega muamua ma le atunuu, ae o loo tuuina mai pea fautuaga mo Samoa.

O le afā o Osai sa iai lea e tusa ma le 850kilomita i Sasae, Saute Sasae o Samoa i le itula e tasi i le aoauli ananafi ma o loo tumau pea ona agai i Sasae ma mamao ese atu ma le atunuu.

Ua faaalia e le vaaitau o fetaliaiga o Savili ma timuga o le vasa Pasefika i Saute o loo iai pea lea i Matu o le atunuu, ma e faamoemoe e agai latalata mai i le atunuu i le po anapo ma le taeao nei.

O loo mataitu pea e le ofisa o le vaaitau tulaga uma mo le saogalemu o le atunuu aemaise lava o fanau aoga o lea faatoa a’e uma aoga i le atunuu.