Ua amata tapena nei le autaaalo a Samoa o le a masii i taaloga a le Pasefika e faia i Solomona.
E tuua lo tatou atunuu i le vaiaso nei, ina ua mae’a ona faamavae atu iai le Malo ma ave iai faamanuiaga ina ia a’e manuia le taumafai o alii ma tamaitai ua filifilia mo le autaaalo e 332, faaopoopo iai ma taitai o autaaalo ma faiaoga faapea isi sui o le pulega o le ‘au, ona maua ai lea o le 433 o le aumalaga atoa.
E 24 taaloga o le a tausinio ai le ‘au masii a le atunuu ma o le afioga i le Sui Palemia na fai ma sui o le Malo e momoli faamanuiaga aemaise o timaiga e tomatau ai alo ma fanau a Samoa a o lei tuua o tatou laueleele mo le atunuu o Solomona.
Le afioga i le Sui Palemia, Afioga Tuala Tevaga Iosefo Ponifasio i le faamavaega ma le autaalo a Samoa mo taaloga a le Pasefika.
Ua faailoa e se molimau faatuatuaina o malaga togipau a le vaalele a Fiti o le a malaga ai le tatou autaaalo.
E pei ona faailoa e le Sui Palemia i le faamavaega i le Aso Faraile na tea nei, o Samoa na tulaga tolu i le aofaiga o pine na manumalo ai i taaloga a le Pasefika i le tausaga e 2019 lea sa talimalo ai lo tatou atunuu.
