Ua iai se valaau ina ia faasā loa ona toe faaulufale mai ni tamato mai Ausetalia i Niu SIla ina ia taofia ai se vairusi ua faaleagaina ai tamato i lea atunuu.
Ua lipotia i le RNZ o le valaau ua sau mai le Tomatoes NZ ma ua ta’ua ua aafia tamato mai Ausetalia i le vairusi ua faaigoa i le faaperetania, Tomato Brown Rugose Fruit Virus ma e lua ni toaga i Ausetalia i Saute ua faamauina le aafia.
Ua iai nisi o oloa e aumai mai Ausetalia ua taofia lē tumau nei e le Primary Industries ae o loo faataga pea tamato mai Kuiniselani lea e faapea e lē o aafia i le vairusi, o loo suesueina foi nisi o fatu o loo ono aafia i lea vairusi.
Fai mai le Tomatoes NZ o le vairusi lea e vave tele le sosolo ma e vave ona faaleagaina ai faatoaga, ma o le vairusi aupito ogaoga lea e aafia ai lea fualaau’aina.
E manatu le Tomatoes NZ e lelei ona taofia uma tamato o loo aumai mai Ausetalia seia mae’a ma malamalama i le suesuega o loo faia i le tulaga o iai le vairusi lea i Ausetalia.
E lē o ta’ua i le lipoti se tali a le Primary Industries i lea valaau.
Puna o Faamatalaga: https://www.rnz.co.nz/news/national/525904/extremely-infectious-tomato-virus-raises-fears-for-nz-growers
