O le fuafuaga e fausia se ofisa tutotonu o le pati faaupufai o le Faatuatua i le Atua Samoa ua Tasi i le faamoemoe e avea ma nofoaga e tapuvae tasi iai ana faatasiga ma isi polokalame, ua lē taunuu lea faamoemoe.
Ua faailoa e le ta’ita’i o le vaega faaupufai le susuga Laauli Leuatea Polataivao Fosi Schmidt, o le fesoua’ina o le lotoifale o le pati o le mafua’aga lea o le toe taatia o lea fuafuaga.
O le malaga a nisi o sui o le pati sa afea ai Amerika, Niu Sila ma Ausetalia i le tausaga na te’a nei sa faailoa ai e le susuga Laauli le fuafuaga e fausia se ofisa tutotonu o le vaega faaupufai e lē gata i le motu o Upolu ae faapea foi le motu tele i Salafai.
O le tapenaga a le Faatuatua i le Atua Samoa ua Tasi mo lana fono faaletausaga o le a faatino i le masina fou o Mati e pei ona faailoa e le ta’ita’i i le feiloa’iga ma tusitala i le faai’uga o le vaiaso, sa avanoa ai ona fesiligia le ta’ita’i e tusa o le fuafuaga e fausia sona nofoaga tutotonu.
