Ua tāpā nei e le faamasinoga ni faamaumauga e pei o se lipoti a leoleo ma le talaaga o se ulugalii poo se aiga e le gata i Samoa a o atunuu i fafo o le a vaetama iai ni fanau mai Samoa.

Ua faailoa lea suiga fou i le faagaioia o pepa i le vaetamaina o fanau e tuuina atu i le faamasinoga faaitumalo a Samoa lea e iloiloina ma faia le faaiuga pe talia pe teena, ina ua mae’a se feiloaiga a le sosaiete a loia i Samoa ma le ofisa o faamasinoga i le vaiaso na tea nei.

Ua faaalia e le Peresetene o le sosaiete a loia le susuga Alex Su’a i se lipoti a le Talamua, ua mafua lea suiga fou e lei faatinoina muamua ona o nisi o atugaluga o le faamasinoga e mafua i aafiaga o nisi o fanau ua mae’a ona vaetamaina, ae ua tulai mai ai ni faafitauli i le sauaina.

O nisi o fanau ua le lelei ona vaai a o nisi foi ua faia iai nisi tulaga e pei o le faapologa, ma lepeti ai lo latou ola saogalemu ma tutupu ai ma nisi aafiaga ogaoga ma tuga.

O nisi ia o atugaluga o le faamasinoga ua faailoa e le Peresetene, a o tālia ai se faaiuga o iloiloga i nisi o talosaga ua taunuu i le faamasinoga mo le vaetamaina o fanau.

O ni tausaga ua tuanai sa aliali mai ai nisi o tulaga maaleale na aafia ai nisi o fanau a le atunuu na vavae e nisi o ulugalii i Amerika, ma masua mai ai i fafo i ni suesuega na faia, le faaaoga e nisi o lea faiga e saili ai a latou seleni i le vaetamaina o fanau.