O le Aso Lua o lenei vaiaso na toe taunuu manuia ai i fanua le lātō i le ea ma le opea i le ala, o le Ta’ita’i o le Malo le afioga i le tamaitai Palemia, le Afioga Fiame Dr Naomi Mataafa, ina ua mae’a nisi o tiute faalemalo sa auai atu ai i le fono a Malo Aufaatasi sa usuia i le aai o Niu Ioka i Amerika, faapea le afea o Ausetalia i le faai’uga o le vaiaso na te’a nei, i fuafuaga tau i lana vaega faaupufai sa talimalo ai le mamalu o le atunuu o alala ma faamautū i le aai tele o Brisbane i le setete o Kuiniselani.
O lona toe taliu mai i le atunuu na avea ai ma ulua’i pasese o se Ta’ita’i o le Malo i tulaga taualoa na afea le maota fou ua mae’a fausia i le malaevaalele faavaomalo i Faleolo, e faapitoa i malo taualoa e afea Samoa.
O se avanoa tāua lea e pei ona faailoa i auala o faasalalauga a le malo, ua silasila ma maimoa ai le tamaitai Palemia i le galuega ua mae’a.
E silia i le 11 miliona tala le tau atoa o lea maota ua ta’ua i le gagana Peletania o le VIP lounge.
