E toalua tamaiti o loo i le falema’i talu mai le po anapo ona o ni faalavelave na tutupu na vaaia ai le sasao ane o le afi i ni nofoaga i Melepone.

O se taavale na soso’aina atu se fale’oti ulu i Bay St i Port Melbourne i le te’a o le tasi i le vaveao fai mai na faaleagaina uma ai le taavale ma le fale’oti ulu i le afi.

O se tagata e aumau i luga tonu ane o lea nofoaga na mafai ona agai ese mai e aunoa ma ni manu’aga ae ua faamaonia mai e paramedics na o latou aveina ane se teineititi ma se teine talavou faapea ma se tamaitai pe ā ma le 40 tausaga i le falema’i ma o loo manuia uma.

Fai mai leoleo na ta’uina atu ia i latou na vaaia se tagata o momo’e ese mai le nofoaga lea na mu ma o loo masalomia e leoleo lenei faalavelave.

Na valaau foi leoleo ma le tineimu i se mu i se apartment block i Richmond i le po lava anapo poo le te’a o le 9, fai mai le 9News e foliga o le tagata e nofo ai i lea apartment na ia toe susunuina lava ma sa faaleaga atu ai ma isi apartments e fā e sosoo ane ai.

Na pu’eina ai e leoleo se alii e 37 tausaga, e leai se soifua na aafia.

O le isi faalavelave o se mu i se retirement village i Patterson Lakes i le te’a o le 1 i le vaveao o loo masalosalo leoleo na amataina foi e se tasi.

O loo faaauau uma ia suesuega i le asō.

Puna o Faamatalaga: https://www.9news.com.au/national/children-in-hospital-after-fires-across-melbourne/b2e52725-84ea-4b55-8532-aae5b6af8efa