Ua patipatia e le alii Komesina o Leoleo a Niu Sila Richard Chambers le finau o ta’ita’i o malo o le Pasefika i le lē ‘alo ai ma le faatinoga o le matāfaioi o le foia ma le tineia o faafitauli o faiga faaālatua i totonu o Auaunaga a Leoleo ma le Ofisa o Tiute, a o molimauina ai le tele o matāupu e alia’e mai i fuālaau faasāina i totonu o atumotu eseese e aofia ai ma Samoa.
O manatu ma lagona ia o le alii Komesina, na faaalia i le mae’a ai o se tasi o faatasiga tele mo itu tau puipuiga o itu tuaoi, Inaugural Pacific Transnational Crime Summit na faia i Suva i Fiti.
Ta’ua e Chambers, na ia molimauina le omai faatasi o ta’ita’i leoleo o le Pasefika e faalogologo ma le toto’a i le fonotaga, ma na vaaia le tuufaatasi o finagalo e iloilo ma sa’ili’ili lelei itu o loo tula’i mai ai nei faafitauli.
Na tatala foi finagalo i auala ma metotia e latou te iloa ai gaioiga ma faatinoga a ē o loo aafia ma o loo iai sootaga i vaega nei o organised crime groups ma le faatinoga o le tufatufaina atu i tua o fuālaau faasāina.
Faamauina i ripoti ma faasalalauga a le leitio faavaomalo a Niu Sila, o lenei fonotaga na auai iai Komesina o Leoleo, o Minisita ma Ta’ita’i mai le Pasefika, na omai faatasi e faasoa manatu ma lagona i le molimauina ai o le avea o le Pasefika ma maketi o ia fuālaau faasāina, e lē gata i lea ae o le tele o taimi ua vaaia ai le faaui atu o faamomoli o fuālaau faasāina i ogasami o le Pasefika faapea le aumai faasolitulafono o tagata.
O nei iloiloga o loo ta’ua ai o le tele o ia vaega o loo uia itu o le Pasefika e aga’i atu i Ausetalia ma le aga’i mai iinei i Niu Sila.
E pei foi ona māua le maualuga o le tau o loo faatauina ai fuālaau faasāina i ia itu o le lalolagi.
Na ta’ua foi e Chambers tulaga o le maualalo o totogi o leoleo i le Pasefika, ma o le tasi lea o vaega ua ma’ale’ale ai lava nisi ma oo ai lava i tulaga o lo latou talia o ni taumafaiga faaālatua poo le bribery.
Faaopoopo le alii Komesina, o le a tuu atu pea le lagolago a Niu Sila i taumafaiga a atumotu o le Pasefika ina ia tali atu i nei aafiaga.
Faaalia foi le auai ai o leoleo Niu Sila i le su’esu’ega ua amata faatino nei mo leoleo Fiti e to’a 11 lea o loo tuua’ia i lo latou sootaga i nisi o tagata e faatinoina ia faiga faasolitulafono o fuālaau faasāina poo drug dealers i totonu o Niu Sila.
Ma ua faamauina e 6 masina o le a faatautaia ai lea su’esu’ega ma e auai ai foi leoleo Niu Sila.
Mo le silafia o lenei matāupu na tula’i mai ina ua maua e le auaunaga a leoleo Fiti se atapu’e na vaaia ai leoleo o loo latou taliaina ni tupe, ma o latou faailoa ai i tagata o loo masalomia e leoleo, o le a oo atu le sa’iliga a le auaunaga ia i latou.
E ui i ia tuua’iga ae na faailoa e Chambers o loo atoatoa lelei lona faatuatuaina ma lona talitonuina o le auaunaga a leoleo i Fiti ma lo latou Komesina, ma sa ia patipatia a latou taumafaiga e tetee atu i faiga faaālatua nei mai totonu o le auaunaga.
O le tasi o vaega fou ma lelei o lea na māua o le a amata faatautaia, o le vaega ua ta’ua o le Pacific Watch, ma o lenei fuafuaga o le a vaaia ai le tuuina o le avanoa i tagata e latou te lipotia atu ai e aunoa ma le faailoaina o lona tagata, ni gaioiga ma faiga faasolitulafono i fuālaau faasāina.
O le naunauta’iga ia saga una’ia tagata lautele e lipoti atu nei soligatulafono ua aafia ai o latou tagata ma eleele.
