A o faasolo ai fuafuaga faataatitia a le vaega faaupufai a le ACT, i lafoga e totogi i luga o tagata o loo umia visa faigaluega mo se taimi, o lea ua faamanino e le ACT e lē o aofia ai tagata galulue faavaitaimi poo RSE workers i ia lafoga.
O lenei faamaninoga na āfua mai i se faamatalaga a lo latou ta’ita’i o David Seymour na fai i le taimi na faatino ai se faatalanoaga ma ni taligā fesili poo le Q&A a le TVNZ, lea na ia faailoa ai le tatau ona aofia o tagata faigaluega faavaitaimi i lea fuafuaga fou, o le totogi ai o le $6 tālā i aso o loo iai lea tagata i le atunuu.
I le faamatalaga a le alii o Seymour, pe ā ma le 75 sene lona tau i le itula, ma e lē telē se eseesega, ona o loo lava le vaega tupe e maua e le tagata e sau mai le Pasefika e pei o Samoa.
Peita’i na toe faasa’o mulimuli mai e le Vaega Faaupufai a le ACT, e leai na sesē le mafaufau o le ta’ita’i ma le fai o ia faamatalaga.
O le uiga moni o le fuafuaga e mo isi tagata o loo umia visa faigaluega i totonu o Niu Sila ae lē aofia ai i latou o loo aga’i mai i totonu o le atunuu i polokalame o galuega faavaitaimi.
I faamaumauga, o loo manino ai afai ae aafia tagata faigaluega faavaitaimi i lenei lafoga o lona uiga e silia ma le 1,200 le tupe e totogi e le tagata e aumau ma galue i totonu o le 7 masina.
Ta’ua e le ACT o le a aumai i se taimi o i luma nisi o faamatalaga ma faamaumauga e tusa ai o fuafuaga ma ta’iala i femalagaa’iga – o vaega e aafia ai vaega tau faato’aga ma meatotō.
Ta’ua o le a faailo mai i le 2 vaiaso o lumana’i i Fieldays.
Puna o Faamatalaga: https://www.rnz.co.nz/news/pacific/596442/act-backtracks-after-seymour-floated-nearly-1300-per-year-charge-on-rse-workers
