Ua faailoa e le faalapotopotoga o teugatupe o mavaega tausi a Samoa le UTOS, o loo mau pea le toovae i fuafuaga a le malo e toe faia malaga faavaomalo a le kamupanī vaalele a le atunuu e faaaogā iai ni vaalele tetele, e pei ona māfua ai ona tatala le avanoa i le lautele o le atunuu ia i latou o aumau ma nonofo i fafo faapea ma Samoa e tuuina atu ni o latou sea poo shares mo lea fuafuaga.
Ua faailoa e lea faalapotopotoga tuma’oti a le malo i se pepa o faamatalaga sa iai feutana’iga na faatino i le va o le Matāgaluega o Tupe, ma le kamupanī vaalele o le Samoa Airways, faapea isi auaunaga a le malo e pei o le Matāgaluega o Faalapotopotoga Tuma’oti a le malo, le ofisa o le Loia Sili ma le UTOS sa autū i lea fuafuaga e pei ona faagasolo tapenaga, ma sa feutaga’i ai foi ma isi tautua ma auaunaga.
O ia talanoaga sa autū i le sa’ilia o faiga ma gaioiga uma talafeagai ina ia faataoto ai se ālafua lelei ma se ta’iala sa’o e faafoe ai lea fuafuaga pe a oo ina faataunuu.
Ua aumai lea faamatalaga mai le faalapotopotoga o teugatupe o mavaega tausi a Samoa ina ua lipotia ai e le nusipepa o le Sunday Samoa faamaumauga, ua faailoa ai le aofa’iga o tagata o alala i fafo ma tagata o faamautū i Samoa ua mae’a lesitala o latou suafa ma seleni i le UTOS i le faamoemoe e faafaigaluega a latou tupe i le faagaioia o malaga faavaomalo e faaaogā ai ni vaalele tetele se lua.
O loo faailoa ai foi i lea lipoti e pito to’atele tagata i Samoa ua lesitala e maua ai le aofa’iga e 352 afe 420 tālā, ae o tagata o loo aumau i fafo i atunuu e pei o Niu Sila, Ausetalia, Amerika, Fiti ma Amerika Samoa o le aofa’iga o seleni o a latou sea e 107 afe tālā.
Ua faafetai ai le UTOS i auaunaga faasalalau ma le atunuu aemaise o ē o alala i fafo ona o le lagona naunau e fia silafia tapenaga uma, peita’i e iai le taimi o le a faamautū uma ai tapenaga ona faailoa lea mo le silafia.
Ua faailoa ai foi i le pepa o faamatalaga mai le faalapotopotoga o tupe teu faafaigaluega o mavaega tausi le naunau o le malo e faailoa i masina o muamua matāti’a o le a ausia i tapenaga uma o loo faagasolo.
