Ua faalauiloa mai nei e le faigāmalo a le National se fuafuaga fou o le a faatino mo pisinisi tetele.
O se fuafuaga o le a vaaia ai le maua o le avanoa e faatino ai ni nonōgatupe a pisinisi tetele ina ia mafai e ia pisinisi ona liliu mai e amata faaaogā malosi’aga faafouina, ma le eletise ae tuuitiitia ai le faalagolago i le faaaogāina o suāuu poo le natural gas.
Faaalia i le ripoti a le leitio faavaomalo a Niu Sila, o le a molimauina le oo atu i le 80% o le a agavaa ai pisinisi i ia nonōgatupe.
Ma o le a mafai ai e faletupe ona tuuitiitia le lafoga e totogi poo interest rates i kamupani, ina ia mafai e i latou o loo talosaga atu mo nonōgatupe ona liliu ese mai suāuu ae aga’i i malosi’aga faaeletise ma malosi’aga faafouina.
Saunoa Nicola Willis, o le a faaagaaga mai le paketi, se vaega tupe e tusa ma le 48 miliona tālā e fesoasoani e puipuia ai tupe faaalu, ae oo atu lava i le 1.2 piliona tālā o le a faaaogā mo nonōgatupe.
O pisinisi e aofia ai falegaosi oloa, faletalimalo, faifaato’aga ma nofoaga e tausi ai tagata matutua, o le a mafai ona talosaga mo nonōgatupe e oo atu i le 50 miliona tālā mo le pisinisi e tasi.
Ina ia agavaa, e tatau ona sili atu i le 1000 gigajoules o suāuu mai le eleele ua faaaogāina i le tausaga ma ua molimauina le faaitiitia o lo latou faaaogāina poo le 15% ae o loo faatumauina pea po ua siitia foi gaosiga.
Ua faamauina e 3 tausaga o le a faatautaia ai lea fuafuaga, ma le agaga e 10 tausaga o le a tuu i pisinisi e togitogi atu ai le nonōgatupe, e fuafua foi i ta’iala ma faiga faavae a faletupe i luga o nonōgatupe tetele.
Faaalia o le a tuu atu foi e le malo le 5.9 miliona i le Pulega o Malosi’aga ma Faasao poo Energy Efficiency and Conservation Authority e fesoasoani atu lea i pisinisi ma kamupanī i tulaga e ono aga’i iai mo le faaaogāina o nisi auala fou ma lelei nai lo o le suāuu, e pei ona maitauina le faaaogāina i le tele o tausaga.
A o tuuina mai lenei fuafuaga fou, o lea na māua foi le fautuaina ai e le malo o tulaga ua iai nei le suāuu i totonu o Niu Sila.
Faamanino e le Minisita Lagolago mo Malosi’aga poo le Associate Energy Minister, Shane Jones, ua pa’ū po ua faaitiitia le pasene o le suāuu faaagaaga i le 23% i totonu o le tausaga, ae o loo iai le faamoemoe e pa’ū le pasene o suāuu gaosi i le 15% i lenei tausaga. Ae na ta’ua e le ta’ita’i o le Itu Agai, Chris Hipkins, e tai tutusa ia fuafuaga ma latou fuafuaga, a o fesoasoani na faia e le faigāmalo a le Leipa mo pisinisi sa aga’i ese mai suāuu, na faalēaogāina uma lava e le faigāmalo fou nisi o na fesoasoani.
Puna o Faamatalaga: https://www.rnz.co.nz/news/political/596274/watch-pre-budget-announcement-at-post-cabinet-briefing
