I le 15 tausaga o avea o se tasi o tagata faigaluega sinia i le malo ma le 9 tausaga sa avea ai ma faauluuluga o le nofoaga tutotonu o su’esu’ega faasaienisi ma le Matāgaluega o Faato’aga ma Faigāfaiva, o lea ua see atu nei se tasi o tamalii sa tautua i le malo le susuga Dr Seuseu Tauati e galue i le vaega tuma’oti poo le private sector, e pei ona filifilia ai e na te tauave le tulaga o le Ofisa Sili poo le faauluuluga o le faalapotopotoga o kamupanī ma pisinisi o loo gaosia oloa ma faatau i fafo oloa mai Samoa.
Ua faailoa e lea faalapotopotoga o le Samoa Association of Manufacturers and Exporters o le avea ai o Dr Seuseu ma Ofisa Sili e lē fesiligia o se avanoa tāua lea o le a sasaa atu ai ona tomai a’oa’oina e faaleleia ma siitia le tautua a kamupanī ma pisinisi i Samoa o loo gaosia oloa ma faatau atu i maketi i fafo.
O se tamalii o loo umia faailoga maualuluga mai se Iunivesite i Peletania, o Iapani ma Fiti i tomai tau su’esu’ega faasaienisi ma faato’aga.
Mo le silafia o Dr Seuseu Tauati sa avea ma Ofisa Sili o le Matāgaluega o Faato’aga ma Faigāfaiva i le 3 tausaga ua mavae ae e le’i toe filifilia i le tausaga nei ina ua mae’a le 3 tausaga sa avea ai o ia ma faauluuluga o lea auaunaga a le malo.
