Ua avea nei le afioga i le Kovana o le Faletupe Tutotonu o Samoa (CBS), Maiava Atalina Emma Ainuu-Enari, o se tasi ua mauaina se avanoa e avea ai ma malo faaaloalogia a le malo Niu Sila, e ala i le polokalame ua ta’ua o le New Zealand Prime Minister’s Fellowship.
O se polokalame e amana’ia ai tulaga taualoa o ia ta’ita’i i totonu o le atunuu faapea tulaga tofi i Matāgaluega ma Faalapotopotoga.
Ma o le tausaga lenei e 2026 ua filifilia ai lana afioga i le tama’ita’i Kovana.
I ripoti o loo faamauina ai o le filifilia o Maiava, o se itu ua amana’ia ma patipatia ai lea tamalii i lana ta’ita’iga ma ana galuega fitā ma le lelei i itu tau tupe i totonu o Samoa.
Mo le silafia, i lalo o lenei polokalame, o le a molimauina ai le avea o lea sui ma malo faaaloalogia a le faigāmalo o Niu Sila, ma o le a maua ai ma le avanoa e auai ai i le tele o faatasiga a le malo faapea foi felafolafoa’iga a ta’ita’i o le atunuu.
O lenei polokalame tāua na amata auai ai Samoa i le tausaga 2005, o se tasi o auala na saga faamalosia ma faatumauina ai le feagaiga a Samoa ma Niu Sila le Treaty of Friendship.
Ua faamauina o lea ua tuuina atu nei le tusi valaaulia i le tama’ita’i Kovana o le Faletupe Tutotonu o le atunuu o Samoa auā lona asia ai o Niu Sila nei ma amata ai lea polokalame i se taimi o i luma.
Puna o Faamatalaga: https://www.facebook.com/share/p/1BZCMXefk9/
