O le taofia e le faamasinoga o le faasalalauina o soo se faamatalaga e faailoa ai gaioiga solitulafono ma tama’ita’i e to’alua na faauluina le tagi faasaga i lē sa avea ma faia’oga ulu o le Manu Samoa, o lea ua aveese le tapu ma ua faasalalau faalaua’itele nei faamatalaga o su’esu’ega a le faamasinoga i le upega tafa’ilagi o loo faailoa ai faai’uga o matāupu tau faamasinoga.
Peita’i o loo tumau pea ona lē faailoaina suafa ma faamatalaga e iloa ai tama’ita’i na aafia ma ua faailoa ai e le afioga i le Faamasino Sinia o le Faamasinoga Maualuga sa feagai ma le su’esu’eina o ia moliaga, le afioga Vui Clarence Nelson, e leai se isi na tuuina atu se finauga e aveesea ai le tapu ona faasalalau suafa o tama’ita’i.
E valu moliaga ua faamaonia faasaga ia Mase Mahonri Schwalger, peita’i e le’i lauina se faai’uga i le faasalaga ona o loo i luma o le faamasinoga se talosaga a le loia a lē ua molia ina ia taofia le faia o se faasalaga ae su’esu’e muamua le talosaga apili ua lu’i ai le faai’uga a le faamasinoga i le faamaonia o moliaga e aofia ai le faaoolima ma le faaoolima matagā.
O le Aso Lulu o lenei vaiaso ua toe fofogaina ai lea finauga faatasi ai ma le isi o matāupu e faasino i le taimi ua lata mai e faamuta ai le tautua a le alii faamasino sinia.
O loo fia silafia e le faamasino pe malilie loia e mafai ona toe foi atu e lau lana faai’uga i se faasalaga pe a mae’a lona taimi galue, ma o loo aiaia lea tulaga i le fuaiupu 67 (3) o le tulafono faavae.
O loo tetee loia a leoleo i le talosaga a lē ua molia ma lana loia ina ia apili muamua le faamaonia o moliaga ona faato’ā lau ai lea o le faasalaga.
