Ua sa’oloto se tinā e 53 tausaga o le soifua mai se moliaga na tuua’ia ai i lona tuulafoa’i o se tasi o fanau a lana fanau ua 3 tausaga, ma lē faia ai lona tiute faamatua, na māfua ai ona fano le ola o le teineitiiti 3 tausaga.
O lē ua maliu o se tasi o fanau o fanau a le tinā poo se grandchild.
O le masina o Oketopa o le tausaga e 2021 na tula’i mai ai lea faalavelave, lea na maua atu ai le teineitiiti ua uma le ola a o moe i totonu o le taavale a le aiga e faapea mai faamaumauga a leoleo, sa o ai lē na molia ma se tasi o le aiga e faatau i le faleoloa.
O le foi ane o le faatauga na aga’i ai le tinā i le fale ma lē na aveina le taavale ma le isi tamaitiiti e tasi le tausaga le matua.
Taunuu le taavale ave le faatau i le fale ma aga’i le tinā e gasese le mea’ai o le aoauli.
O le vela o le mea’ai na sa’ili ai loa le tasi o le fanau le teineitiiti 3 tausaga ma le manatu o loo alu i se isi nofoaga lata ane i le fale, peita’i na maua atu i totonu o le taavale o loo vili uma i luga faamalama ua lē tali ane ma ua uma lona ola.
Sa finau le loia sa tula’i mo le tinā na molia e leai se solitulafono e tali iai lē ua molia ona e lē o mafai e leoleo ona tuuina atu ni mau e faamaonia ai o le tinā ua molia e iai se gaioiga solitulafono na ia faia e fesoota’i i le fano o le ola o le teineitiiti.
Na talia e le faamasinoga le finauga e faavae i mau mai su’esu’ega na faatino, aemaise sa silasila foi le faamasinoga i nisi o matāupu faapea sa su’esu’eina e le Faamasinoga Apili a Niu Sila.
O le mae’a o ia sa’ili’iliga ma iloiloga na taunuu ai le Faamasinoga i le faai’uga e solofua moliaga o le tinā o Pelia Sauvao Hakai Asoleaga o Faleasiu.
O le faai’uga lenei a le afioga i le Faamasino o le Faamasinoga Faaitumalo le afioga Mata’utia Raymond Schuster na fofogaina ia Aperila i le savalia ai o le lima tausaga talu ona tupu le faalavelave, ae faato’ā faasalalau faalaua’itele i le i’uga tusitusia, i le masina nei o Iuni i le upega tafa’ilagi o loo faailoa ai faai’uga o matāupu tau faamasinoga a Samoa.
