O le manatu na faaalia e le Palemia o le Malo Tausi Tuilaepa Lupesoliai Sailele Malielegaoi e atofa ai Ofisa Sili ma Sui Ofisa sili o Matagaluega a le malo e galulue lea i le faiga palota lea e fuafua mo le aso 21 o Me.

O se faaiuga e le’i talia e le taitai o le Vaega faaupufai a le Faatuatua i le Atua Samoa ua Tasi, Fiame Naomi Mataafa na ia faapea o se gaioiga e lē talafeagai ma e lē o gatasi ma tulafono o le faatautaiga o soo se faigapalota i le atunuu.

O le finau a Tuilaepa o le mafuaaga ua manatu ai e galulue Ofisa Sili ma latou sui lagolago i le isi faigapalota ona o nisi o faaletonu  na iai le faatinoga o le Palota na sei mavae atu nei i le Aso 9 o Aperila e pei  o le tele o galuega na toe faia e le Ofisa o faigapalota ina ua iloa mulimuli ane e sesē le faitauga o nisi o palota.

Taua e Fiame “ afai ae galulue Ofisa Sili ma Sui Ofisa Sili i le faatautaiga o Palota o lona uiga o le a faalua foi ona totogi ae galo ai tagata ua uma na fai a latou aoaoga i le faiga o palota.

Na ia taua foi pe aiseā ua tali mai ai Tuilaepa i latou fesili ae tatau ona talanoa sa’o mai le Komesina o Faigapalota o ia lea o loo nafa ma lea galuega.

O le Aso Tofi nei o le a tolaulau ai le tagi a le vaega faaupufai a le FAST e fesiligia ai le malelega a le Ao o le Malo lea na faia e faaleaogaina ai le faigapalota muamua ae toe fai seisi faigapalota. Na taua e le Faamasino Sili afioga Satiu Simativa Perese, o lea mataupu o le a ave iai le faamuamua a le faamasinoga maualuga ina ia taiala ai nisi o mataupu o loo i luma nei o le faamasinoga e aofia ai ma le ono toe faia o se faigapalota fou.