O le falepuipui i Tanumalala ua amata tuli ai nei le faasalaga soloatoa o le tamā o Auia Fereti Moefiti o Fogapoa i Savaii ua 54 tausaga o lona matua, ina ua taunuu iloiloga a se laulau o faatonu sa suesueina mau o le faamasinoga o lē ua faasalaina, i moliaga e lua o lona faaoo o le maliu i se tamā ma sona atalii i se gaioiga solitulafono na ia umia ai se laau malosi o le ituaiga o le 22 rifle poo se pulutasi.
O Su Pa’i Tonise, 60 tausaga o le soifua ma lona atalii o Phillip Misipope Tonise 18 tausaga le matua na fano o la sofua i lea gaioiga solitulafono, na mafua ona o se fanua.
O Iuni o le tausaga e 2022 na tulai mai ai lea faalavelave na maliliu ai le tamā ma lona atalii i le solitulafono na molia ai Auia, lea e lē gata ina faamaonia ona moliaga o le fasioti tagata faamoemoeina ae faamaonia foi lona moliaga o lona umia o se aupega matautia.
O le maota faamasino i Tuasivi na faagasolo ai le suesueina o molimau o lea faamasinoga i le vaiaso na te’a nei, ma faamae’a ai i le Aso Faraile i le faia o iloiloga a le laulau o faatonu ma aumai ai le latou faai’uga.
O aga masani a le Faamasinoga Maualuga a faamaonia le solitulafono o le fasioti tagata faamoemoeina e faia ai lava ma le faaiuga o le tuuina atu i le falepuipui mo le tuliina o le faasalaga soloatoa.
O le faasalaga maualuga lenei e agavaa ai sē e faamaonia ma faasalaina ai, e tuuina atu sana talosaga i le komiti o le palola mo se iloiloga i le magalo i tua pe a mae’a ona tuli le 10 tausaga o le faasalaga soloatoa i le falepuipui.
