I le nofo taofia o Talalelei Pauga i Ausetalia ma faaauau ona nofo taofia i le vaaiga a leoleo ina ua aumai faapagota i Samoa i le amataga o le masina nei o Setema, o lea ua talia e le faamasinoga lana talosaga e tatala i tua e faatali ai le aso o le a suesueina ai lona moliaga o le taupulepule e faaoo le maliu i lē sa avea ma Palemia o le atunuu.

O lea ua faailoa i le faaiuga o lana talosaga e tatala i tua i aiaiga ua faataoto e le faamasinoga e tatau ona usitai iai.

Ua faatonuina Talalelei Pauga e nofo i le aiga o le tamaitai loia o Josephine Fuimaono Sapolu i Lalovaea, ma ia saini faalua i le vaiaso i le ofisa o leoleo i Apia.

Ua faasā ona ia toe faia ni tusitusiga ma ni faasalalauga i luga o auala o fesootaiga televavave le social media, ua tapu foi ona latalata i le nuu ma le nofoaga o loo faamautu ai lē o loo tagi, ma ua tapu foi ona latalata ma talanoa i molimau a leoleo.

E lua afe tala se tinoitupe ua faatonuina e le faamasinoga lē ua molia e totogi e avea ma faamaoniga ona o le toe solia o se tulafono a o tatala ai i tua e faatali lona faamasinoga.

O le a lē toe faafoiina iai lea tupe pe a ia lē usitaia lea aiaiga.

Ua tuuina atu le tali tetee a Talalelei Pauga i le moliaga ua tuuaia ai. 

Ua faaleo le lē talia e le faamasinoga o mau a leoleo na lagolago ai lo latou teena o le talosaga a lē ua molia, ona e iai vaega tāua e lei mafai ona tuuina atu ma maua iai se tali a leoleo.

O le latou tetee i le talosaga na toe suia i lo latou lagolagoina o le tatala i tua o Talalelei Pauga, ina ua latou talia le finauga a lē ua molia ma lana loia, o le a faamautu i le aiga o se tamaitai loia Talalelei e faatali ai aso o lona faamasinoga.

E toatolu isi sa molia i le moliaga o loo tuuaia ai Talalelei Pauga ua mae’a o latou faamasinoga ma o loo tuli nei o latou faasalaga i le falepuipui.

O i latou ia e aofia ai Taualai Leiloa na ioe i le moliaga, ma Malele Paulo faapea Lema’i Faioso Sione na o la teena le moliaga ae na faamaonia i le mae’a ona suesue o molimau a leoleo.

O le afioga i le tamaitai faamasino o le Faamasinoga Maualuga, Afioga Niava Mata Tuatagaloa sa iloiloina le talosaga a Talalelei Pauga.