O le fuafuaga fou a le faalapotopotoga o le faaputuga tupe mo le lumana’i manuia o tagata le NPF e faatino se fesoasoani i le faatupeina o togafitiga faafoma’i poo se medical scheme, o le a amata i le faai’uga o le vaiaso nei ona faatalanoa ma le mamalu lautele o le atunuu.
Ua faailoa i se faasalalauga faalaua’itele a lea faalapotopotoga tuma’oti a le malo o mataupu uma o le a fia silafia e le atunuu e faatatau i lea fuafuaga o le a tali uma i le feiloa’iga e faia i le Aso Toonai nei i le maota o le Tuutuuileloloto lea sa igoa muamua o le Feiloaimauso.
E lē gata o le avanoa muamua lea e faatalanoa ai lea fesoasoani mo le atunuu i Upolu ae o le Aso Toonai o le vaiaso a sau e faia ai i Savaii i le hall o le Apitaopisaga i Salelologa.
O le lipoti faaletausaga a le NPF o le tausaga e 2022 o loo faailo mai ai lea fuafuaga o le faia o se fesoasoani mo le faatupeina o togafitiga faafoma’i e lē gata mo tagata fai saofaga i le faalapotopotoga ae o le tatou atunuu lautele.
