O le faai’uga o le vaiaso e malaga ai le Palemia o Niu Sila, Christopher Luxon i Iapani, peitai a o lei alu ese atu o le a muamua talimalo i le ta’ita’i o le malo o Saina.

O lea faatoa taliu mai Luxon mai ana faigamalaga na iai i Niue ma Fiti i le vaiaso talu ai, ma o le Aso Sa a sau lea ua toe tapena ai mo Tokyo.

Saunoa Luxon e tāua tele Iapani i le tamaoaiga o Niu Sila ma o fefaataua’iga lava le itu o loo mafuli iai tapenaga o le faigamalaga.

O le faimalaga ai i Tokyo o le a o faatasi ma sui o le vaega o pisinisi faapea le minisita o fefaataua’iga, ma o le a maua ai foi le avanoa e faalauiloa atu ai Niu Sila i Iapani.

A o lei oo ai la i le Aso Sa, o le faai’uga o le vaiaso e malaga mai ai le ta’ita’i o le malo o Saina, poo le atunuu na sau ai le $38 piliona mai fefaataua’iga i le va o atunuu e lua i le tausaga talu ai.

O le faato’ā toe sau lea o le Premier o Saina i Niu Sila talu mai le 2017, ma o se faigamalaga foi ua faamanatu ai le 10 tausaga talu ona iai le faiga faapaga a Niu Sila ma Saina i lalo o le New Zealand China Comprehensive Strategic Partnership.

Ua fetaui le malaga mai o le ta’ita’i o Saina i le taimi o loo faatalanoa ai pea le ofi atu o Niu Sila i le vaega lona lua o le AUKUS lea o loo iai faatasi Ausetalia, Amerika ma Peretania.

Puna o Faamatalaga: Prime Minister to travel to Japan, Chinese Premier to visit NZ (1news.co.nz)