Ua molimau le pulea’oga o le Mount Albert Grammar, Patrick Drumm i le suiga ua vaaia i le latou a’oga talu ona faasā telefoni i a’oga.
Lipotia i le Newstalk le faatalanoaga ma le alii pule fai mai o le ulua’i taimi lea ua toe faalogoina ai le ta’e o se faamalama i se polo lakapi, talanoaga i taimi o mālōlōga ma tamaiti ua vaaia le sogasogā ma o lana lea mātau i le suiga lelei ua iai talu ona faasā telefoni i a’oga.
Na faasoa le pulea’oga i lea lipoti i taimi a o lei faasāina telefoni e vaaia tamaiti a’oga na o le nofonofo solo ma punonou i le faiga o telefoni, leai ni taaloga ma ni talanoaga e faia ae alu uma le mafaufau i le screen o le telefoni peitai ua telē se suiga ua vaaia i le taimi nei, ua vaaia le tele o taaloga ua faia i mālōlōga ma tulaga masani o fesoota’iga a tamaiti a’oga ma o se itu lelei tele lea.
E lei leva atu foi ona lipotia atu e talafou molimau mai nisi foi o a’oga i le atunuu i tulaga lelei foi ua vaaia i fesoota’iga i totonu o a’oga talu ona faasā le faaaogā ai o telefoni.
