O taavale, pasika, uila vilivae e ola i le eletise ma uila vilivae masani, faapea isi meafaigaluega sa fesoasoani ai le Matagaluega o leoleo a le malo o Ausetalia, i galuega a leoleo i Samoa mo le taligamalo i le Fono a Malo o le Taupulega, ua faaaogā nei e le matagaluega o leoleo, falepuipui ma le toe fuata’ina.
Ua avea foi ia meafaigaluega ma meatotino poo ni aseta a le matagaluega.
O le tau atoa o lea foa’i e $260,000 tala Samoa e lē aofia ai ma le $30,315 tala o le totogi lea o le inisiua o taavale.
O le tasi o taavale ua tuuina atu mo galuega a le pulega o tineimu ma galuega lavea’i i taimi o faalavelave.
O taavale o le ituaiga o le FORD Everest SUV e lima, ma taavale e lua o Ford Rangers Wagon e $315,628 tala Ausetalia le tau aofa’i.
Ua faailoa e le matagaluega o leoleo, falepuipui ma le toe fuata’ina le tuuina atu o ia meatotino taugatā e le sui o le Malo o Ausetalia i Samoa, ma le faatuatuaga o le a tausia lelei ma faaaogā i galuega e tautua ai le malo o Samoa ma lo tatou atunuu.
O se foa’i mai le AFP poo le Australia Federal Police o loo faipaaga pea ma le matagaluega i le tele o polokalame ma auaunaga mo le siitia o le tautua a leoleo o Samoa.
O le Minisita o le matagaluega le Komesina ma le pulega sa latou taliaina lea foa’i i se sauniga i le Aso Faraile na te’a nei.
E ese mai lea fesoasoani a leoleo Ausetalia, ua faailoa foi e le matagaluega le tuuina atu e le malo o Saina o ni masini ma meafaigaluega mo le vaega o su’esu’ega o tulagalima poo fingerprints.
O lea foa’i ua faaopoopo i se a’oa’oga e lua vaiaso na auai atu iai ni alii ma tamaitai leoleo o loo galulue i lea vaega tāua o le auaunaga faaleoleo.
