Ua manumalo nei le alii Samoa o loo aumau i Ausetalia ia Jai Opetaia i le fusi o le siamupini o le lalolagi le Cruiserweight World champion ina ua ia faato’ilaloina le alii ia Mairis Briedis i le po anapo i Broadbeach, Gold Coast i Ausetalia.
E ui e le’i faigofie le fusuaga ona o le aafia ai o le auvae o Jai i le taamilosaga lona lua peitai e le’i faavaivai ai lea alii ma faaauau ai seia oo ina mae’a uma taamilosaga e 12.
Na autasi uma faamasino e tuu atu le manumalo ia Jai Opetaia ma o faai’uga nei a faamasino taitasi: John Basile (116-112), Steve Weisfeld (116-112) ma Katsuhiko Nakamura (115-113).
O le lona 22 mai Lea o fusuaga a le alii Samoa ma e leai se faia’ina. Mai nei fusuaga e 17 taaloga na manumalo ai Opetaia i le tu’i oti (knockouts).
E 27 tausaga o lea alo o le atunuu mai afioaga o Lalomanu ma Apia ma ua manumalo nei i le fusi o le IBF ma le Ring Title.
