O lea ua tapena le aulakapi a Apia poo le Maroons o loo i Aukilani e malaga i Samoa i le faamanatuina o le 100 tausaga talu ona faavae mai le lakapi i totonu o Apia.
O lenei sauniuniga ua faatapena ai ni sailiga seleni e ala i le latou posiva o le a faia i le Oats Club i Otahuhu i le aso 3 o Aokuso, faatasi ai ma le latou taumafataga tele o le a faia i le maota o Samoa i le aso 24 o Aokuso ona tapena ai loa lea e malaga i Samoa ia Setema i le faamoemoe o le kalapu lakapi a Apia i lona aso fanau.
O se fuafuaga ua auaufaatasi iai le pulega ma le ‘au atoa ina ia mafai ona malaga le ‘au i Samoa i le aso fanau, ona e na o le pau lea o le ‘au a Apia o loo mafai ona tauaveina le igoa o le lakapi a Apia i atunuu i fafo aemaise lava i Niu Sila nei.
O le auai atu o le ‘au a le Maroons i lenei faamoemoe ona e iai le talitonuga o le pulega ma le ‘au atoa, e lē maua faalua se faamanatuina o se 100 tausaga, ma ua alagatatau ai loa ona masii le ‘au.
O le ‘au a le Maroons o loo auai i le iuni a le Aukilani Samoa, ma e lē misi lava se tausaga ma auai le aulakapi a Apia i lenei tamilosaga.
Ma ua 38 nei tausaga talu ona faavae mai le ‘au lenei i totonu o Aukilani.
O le fofoaina o le lakapi i totonu o Apia fai mai na oo atu nisi o felela i Apia ma avatu le taaloga lakapi i le tausaga 1920, ma e fā tausaga sa glulue ai nei felela i le a’oa’oina o le lakapi i totonu o Apia, ona amata faavaeina loa lea o le kalapu lakapi i Apia i le 1924.
E tolu ‘au sa amata ai le lakapi i totonu o Apia, o le ‘au a pailate ma le ‘au a le falemai.
O upu tuugutu a toeaiina sa tuutaliga mai i nisi o tamalii o loo gafa ma lenei kalapu lakapi, o le jersey lanu pa’epa’e sa faaaogā e toeaiina i aso la sa taalo ai ma amata ai le kalapu, ae na iai se tasi o tamaloa palagi na oo atu i lea vaitaimi i Apia i totonu o le kalapu, ma o ia tonu lea sa ia avatuina le jersey lanu mūmū lea ua oo mai lava i le taimi nei o loo faaaogāina lava e le kalapu a Apia i ana taaloga e lē gata i Samoa ae o Niu Sila.
Sa tele foi le sao o le afioga ia Laauli Allen Grey i totonu o lenei kalapu.
Sa avea o ia o se faamanuiaga ma faamāmā avega i le tele o mea e fai a le kalapu e pei o togiga a ‘au taitasi a le kalapu ma isi lava vaega sa iloga ai le sao o lenei tamalii.
Sa faamauina foi nisi o afakasi sa tuu atu o latou tau’au sa galulue atu ai i totonu o le kalapu.
O le tausaga e 1987 o le uluai tausaga lea na masii mai ai le aulakapi a Apia i lana malaga taamilo i Niu Sila.
E toatele nisi o alo ma fanau o le kalapu a Apia sa maua avanoa e taaalo ai i le Manu Samoa aemaise ai ua maua nisi o kalapu i atunuu i fafo auā le manuia o aiga.
