Ua taliu mai i le atunuu le sa’iliga a le Minisita o Galuega Tetele o loo iai ma le vaaia o le faalapotopotoga o vaa a Samoa ma le pulega o uafu ma taulaga, i le fia maua o se isi vaa la’upasese ma ave ai uta ma taavale mo le va o Upolu ma Savaii.
Ua faamautū ai nei le aumaia o se isi ituaiga o vaa fou o se fausaga e ta’ua o le Catamaran mai se kamupani vaa i Ausetalia.
Sa faailoa e le Minisita le tofa Olo Afoa Fiti Vaai le mautū ai o lea fuafuaga e pei ona mana’omia ai se faai’uga a le Kapeneta.
I se talanoaga ma le minisita na ia faailoa ai o le tau o lea vaa e silia i le 8 miliona tala Amerika, peitai ua iai fetuuna’iga ma le kamupani e ana ma ua maua ai se tau pa’ū e tusa ma le 7 tesimale 8 miliona tupe Amerika.
O galuega ua amata faagasolo i ni suiga o le fausaga o le vaa fou o le a faaopoopo i le tautua a vaa o le malo i le va Upolu ma Savaii, ua fuafua ai poo le faai’uga o masina o Iuni ma Iulai o le tausaga fou e taunuu ai le vaa fou.
