Matua’i ta’utino le to’atele o faipisinisi laiti i Saina i le faigatā o le soifuaga ua iai nei ma ua latou faaigoa ai Trump o se tagata ua faaletonu le mafaufau.
Fai mai le mau a nisi o le aufaipisinisi ua na o le nonofo o oloa i totonu o o latou pusa i fale teuoloa i Saina ma o le a tumau ai pea i’i mo sina taimi se’i vaganā ua iai se suiga i totogi faaopoopo poo tariffs a Trump ua oo i le 145 pasene i oloa mai Saina e masani ona ave atu i Amerika.
Ua molimau se tasi faipisinisi pe ā ma le ‘afa o oloa e gaosia e lana pisinisi e faatau aga’i i Amerika ma o se pisinisi laitiiti foi ma ua matua’i faalogoina lava aafiaga o ia ituaiga totogi faapea ua faia.
Fai mai pule o falegaosi oloa o lo latou popolega afai lava e lē suia le manatu o Trump i ia totogi o lona uiga e i’u lava ina oo i se tulaga faaletonu a latou pisinisi.
O le vaiaso talu ai na taofia lē tumau ai e Trump le faia o nisi totogi faaopoopo i oloa a isi atunuu ma tumau ai le to’atele i le 10 pasene o tariffs peita’i e na o Saina lava o loo tumau pea i le 145 pasene.
O loo lipotia foi le oo o ia aafiaga i tagata faatau i Amerika ona o le taugatā foi o le tau ua latou faatauina ai oloa e masani ona faatau atu mai Saina.
Puna o Faamatalaga: https://www.bbc.com/news/articles/c05ne2vmd3po
