E tāua le galulue faatasi ma feoeoea’i i le fetufaa’i o tomai ma malamalama aemaise o le ofoina o le fesoasoani pe a oo i taimi o ni faalavelave faafuase’i matuiā.
O le autū lea o le osiga feagaiga i le va o le pulega o tineimu ma galuega lavea’i i taimi o faalavelave faafuase’i a le malo o Samoa ma le vaega o le tineimu ma galuega lavea’i a le malo o Fiti, e pei ona faamautū i se maliega ua sainia lea e ta’ua o le memorandum of understanding.
A o iai i Fiti le Komesina o le pulega o tineimu ma auaunaga lavea’i i taimi o faalavelave faafuase’i a lo tatou atunuu le afioga Tanuvasa Oloapu Petone Mauga ma nisi o ofisa sinia o lea pulega a lo tatou malo, sa sainia ai lea maliega ua autū lava i le fetufaa’i o auaunaga i le itu i a’oa’oga ma le faaaogāina o tomai e faatino ai lea tautua mo le lautele o tagata.
O le finagalo o le afioga Tanuvasa e pei ona faailoa i se pepa o faamatalaga, e tāua tele le galulue faatasi ina ia maua le feoeoea’i i le fesoasoani o le tasi i le isi nai lo le galue to’atasi e aunoa ma le maua o le lagolagosua i le faatinoga o lea auaunaga tāua.
