O le meaalofa tupe e $42.35 miliona tala ua tufa e le Faalapotopotoga o Faaputugatupe mo le Lumanai Manuia o Tagata le NPF i le au fai saofaga faapea le au penisione ma Faalapotopotoga Tumaoti e 13 e faailoga ai le 50 tausaga o le Faalapotopotoga na tāpā ai e le Minisita o Tupe se faamalamalamaga a le Ofisa Sili o Pulega a’o le’i faamaonia e le Kapeneta le fuafuaga.
O le tusi a le Minisita i le Ofisa Sili o le Aso 15 o Mati o loo faaalia ai e le afioga Mulipola Anarosa Ale Molioo lona popolega ma ia tāpā ai le alii pule sili ia Pauli Prince Shuren e tuuina atu uma faamaninoga o fesili na ia ave i le Pule o le NPF. O le kopi o le tusi a le tamaitai Minisita o Tupe o loo ia fesiligia ai poo a Faalapotopotoga Tumaoti ua fingalo le Pulega ma le Komiti Faafoe e ave iai le meaalofa tupe ae pe o talafeagai lea fuafuaga.
O le isi fesili pe ua talafeagai fuafuaga ma le tulafono o le Faalapotopotoga o Lumanai Manuia o Tagata. O loo fesiligia ai foi e le Minisita le aofia i le tufatufaga o meaalofa o le iupeli auro, o le $50 mo le au penisione, ona o le finagalo a le tamaitai Minisita o loo iai ma le vaaia o le NPF e le’o toe totogiina ni saofaga a le au matutua ua aulia le 65 tausaga ma luga atu o loo maua i le faamanuiaga o le penisione i masina taitasi o loo totogi e le Mālō e ala i le NPF.
O le feiloaiga a tusitala ma le Ofisa Sili faapea le Minisita na faailoa ai meaalofa tupe a Faalapotopotoga a le au fai saofaga faapea le au penisione ma Faalapotopotoga Tumaoti e leai ma se faamatalaga na folasia e faatatau i le faaiuga a le Pulega ma le Komiti Faafoe. E leai foi se saunoaga a le Alii pule na afea i lona finagalo pe ua mafua i se ā ona aofia le au penisione ma Faalapotopotoga tumaoti e 13 i le tufatufaga o le meaalofa tupe o le Iupeli auro o le NPF.
Ae i le tusi a le Minisita i le Pule Sili o le Faalapotopotoga ua ia fesiligia ai le 5% ua ioeina mo le au fai saofaga ae pe aisea ua lē 8-10% ai le meaalofa. Faaalia e Mulipola i lana tusi o se taimi taua lenei e tatau ai ona ave sa’o faamanuiaga i le au fai saofaga o loo fautuaina lea faalapotopotoga a le Mālō.
O loo ave iai ma le fautuaga a le Minisita i le Pule Sili e silasila e siitia le meaalofa tupe i le 10% peitai e pei ona silafia ua na’o le 5% ma ioeina e le Komiti Faafoe lea ua totogi muamua le 3% ao leisi 2% faatoa maua i le masina o Tesema.
