E le’i mae’a su’esu’ega a leoleo e faamautū uma ai a latou moliaga faasaga i se alii faipisinisi Saina ua faailoa i le faamasinoga lona igoa o Tao Liu poo Liu Tao, lea na ia umia se laau malosi na ia faapāpā ma faamanu’alia ai se alii leoleo.
O le Aso Gafua o lenei vaiaso na tula’i ai mo le taimi muamua i le faamasinoga lē ua molia ma faailoa ai e loia a leoleo lo latou teena o le tatala i tua o lea alii faipisinisi Asia ona e iai nisi o mataupu sa molia muamua ai ae e le’i oo atu i le faamasinoga, ma sa mafua ai se poloa’iga e sa’ili i se tusi saisai.
O loo molia i le taimi nei Tao Liu poo Liu Tao i lona taumafai e faaoo le oti ma lona umia o se aupega mata’utia o se fana.
O loo molia foi i lona faapā o le laau malosi e pei ona sa aafia ai se alii leoleo sa aofia i se vaega o malu o le malo mai le ofisa o leoleo i Tuanaimato sa aga’i e tali le valaau mo se fesoasoani i se vevesi a lē ua molia ma se tamaitai Samoa sa la mafuta muamua.
O le aso 17 o Fepuari e toe valaau ai moliaga o le alii Saina faipisinisi.
