Ua iai le tagata ua molia e leoleo i le faalavelave na fanaina ai Mahmoud Brownie Ahmad i fafo ane o se fale i Western Sydney i le masina o Aperila o le tausaga nei.
Lipotia e le 7News na pu’e e le ausuesue se alii e 49 tausaga mai Campsie i le masina o Me ona o le faalavelave lea ma su’eina foi e leoleo se tasi o fale i Wetherill Park ua feta’ua’ina na maua iai e leoleo le silia ma le 25 kilo o le fualaau faasāina o le aisa e oo atu lona tau i le silia ma le 22 miliona.
Na maua ai foi e leoleo ma se vaegatupe e 200 afe. O le asō la ua faailoa mai ai e leoleo ua faia nei moliaga i lea tagata ma ua feta’ua’ina foi le aofia ai i le fuafuaina o le faaoo o le maliu ia Mahmoud Ahmad. Ua taofia i le vaaiga a leoleo seia toe tula’i i le faamasinoga i Fairfield i le aso 6 o Iulai.
