O le maota o le Malo o loo i le itu i uta o le magatolu e afe ai i le ala laupapa sima i Lelata ma agai atu ai i le Iunivesite Aoao a Samoa ma le Kolisi o Samoa, ua avea nei ma maota aloaia e afio ai le Faamasino Sili le afioga Satiu Simativa Perese ma lona faletua o Franzine Perese.

Ua mafua ona avea ma maota aloaia poo le official residence mo le Faamasino Sili ma lona aiga ona o lea ua tuu atu le fanua ma le maota i le pulega a le Matagaluega o Faamasinoga ma le faafoeina o mataupu tau faamasinoga.

O tausaga a o nofoia e le Faamasino Sili ua tuumalo le afioga Patu Tiavaasu’e Falefatu Maka Sapolu ma lona faletua, sa vaaia ma pulea le fanua faapea le maota e le Faalapotopotoga o Fale a le atunuu le Samoa Housing Corporation.

O le faaiuga o le vaiaso i le Aso Toonai na aloaia ai le tuuina atu o le maota i le afioga i le Faamasino Sili ma lona faletua mo le faaaogāina, ina ua mae’a ni galuega na toe faaleleia ai, lea ua faailoa i se lipoti a le nusipepa o le Sunday Samoan e 400 afe tala na faaalu ai e le matagaluega o faamasinoga ma mataupu tau faamasinoga.

O se sauniga na momoli ai le faafetai a le Faamasino Sili le afioga Satiu Simativa Perese i le tamaitai Minisita o faamasinoga le tofa Matamua Sili Vasati Pulufana i lona taulamua i tapenaga mo le tuuina atu o le maota e faamautu ai Faamasino Sili mo le taimi nei ma le lumanai.

Sa faamautu le Faamasino Sili i se maota totogi o le malo i Motootua ina ua amata ona tiute i le tausaga e 2021.