O le faamuamua a le kamupani vaalele o le Samoa Airways o le saogalemu o tagata faimalaga i vaalele o se tasi lea o ana ta’iala ma faiga faavae e faasilisili i lana auaunaga.
Ua faailoa e le pulega o le kamupani vaalele i se pepa o faamatalaga o le mafua’aga lea na faatino ai se faiga faavae ia Oketopa o le tausaga na te’a nei 2024 e faatino ai su’ega poo test mo ana tagata faigaluega i le tagofia o fualaau faasāina ma le ‘ava malosi.
O le Aso Lulu na te’a nei sa lipotia le taofia ai o malaga a vaalele a le Samoa Airways i le va ma Amerika Samoa e mafua i le taunuuga o ia su’ega poo test.
I le pepa o faamatalaga mai le kamupani vaalele ua faailoa ai, e to’atasi se pailate na maua i lea su’ega sa ia tagofia fualaau moe poo sleeping bills.
Na taofia ai ona toe fealua’i ae faia le isi ana su’ega ma iloa ai ua lē o toe iai se malosi o lea fualaau.
Ua toe faataga ai nei lea pailate e faaauau ona galue ae ua ave iai ma le lapata’iga.
O su’ega lava ia na maua ai foi nisi o le aufaigaluega sa latou tagofia nisi o ituaiga o fualaau faasāina ma le ‘ava malosi.
E to’atolu ua faamālōlō ua taofi ona toe faigaluega se’i maua mai le faai’uga o le isi a latou su’ega i le tagofia o fualaau faasāina e lē o faailoaina mai e le kamupani vaalele poo le ā tonu lea fualaau faasāina.
O le isi to’aono o tagata faigaluega na maua ia latou su’ega le tagofia o le ‘ava malosi ma ua ave iai le lapata’iga.
O ia su’ega sa faatino e le nofoaga o su’esu’ega faasaienisi le SROS o loo i Nafanua.
O le tasi o tautua o loo faia e le Samoa Airways o galuega o le fuaina ma lau uta a vaalele faapea uta i le taimi e taunuu ai malaga a vaalele o kamupani o le Fiji Airways, Qantas, le Virgin Australia ma le Samoa Airways.
O le isi lea o auaunaga e ave iai le faatāua o le saogalemu ma e tāua ai e pei ona faaalia e le kamupani vaalele a Samoa le tausisia e lana aufaigaluega o aiaiga tau tulafono faavaomalo mo kamupani vaalele.
