Na atoa lelei le ono taamilosaga o le fusuaga a le alo o Samoa, le alii o Ato Plodzicki-Faoagali ma lana paga le alii Fiti o Jope Ubitau.
O le lona lua ai lea o fusuaga faapolofesa a Faoagali, ma ua manumalo ai i ana fusuaga faapolofesa uma e lua.
Na faatalanoa le alii o Ato i luga o le Radio Samoa i le taeao o le Aso Faraile i le taimi o le Breakfast Show e le susuga Tavai Meni, ae faataunuu ai lana fusuaga i le afiafi.
Ma e tusa ma se faamatalaga a Ato ina ua fesiligia i lana paga o le a la iloilo, ae na saunoa Ato o lea ua logoina o ia ua toe suia lana paga, ma e oo mai lea taimi o le faatalanoaga, e na te le o iloa poo ai le tama fusu lea o le a la fetaui.
Ae na lagona lava le lototele o le alo o Samoa ma ia ta’utino ai, o ia ua lava tapena poo ai lava lana paga lea o le a la fusu, ae ua ia sauni e faaalu le taamilosaga muamua se’i faamasani ma ia tulimata’ia ai le ituaiga fusu o le a agai mai ai lana paga, ona amata faatulaga ai loa lea o lana taalo mo le atoaga o le taaloga.
Ma na matauina lava le taufai malolosi o alii fusu uma e toalua ma sa fetogia’i foi tu’i malolosi a alii fusu uma e toalua, peitai na iloga lava le tau lelei ma le vave o le migoi a Ato i le taaloga atoa.
O le iuga na auautasi uma faamasino e toatolu e ave le manumalo ia Ato Plodzicki-Faoagali: 58 – 60, 58 – 60, 57 – 60.
