O se tamaitai talavou na maua ua maliu i totonu o se aoga i le ogatotonu o Sini, ua faailoa mai e iai manu’aga i lona ulu ma o loo suesue nei e leoleo.

Lipotia e le 9News i ni nai minute i le vaeluaga o le po anapo ae valaau ane le fesoasoani faavavave i le St Andrews Cathedral School i Kent Street i le taulaga o Sini. 

Na maua atu iai e leoleo le tinomaliu o sia tamaitai pe ā ma le 20 ma ona tupu tausaga i le vaega e iai falelēta’ua tulou i le gym a le aoga.

E lei faamautuina mai lē ua aafia ae fai mai leoleo e faigaluega ai i le aoga. 

Faailoa i faamatalaga a leoleo pe a fua i ona manu’aga e foliga mai na faaoo iai e se tasi le oti ma o loo tālia ai nei se isi lipoti lata mai o lea faalavelave.